WYSIWYG Web Builder
У Мёрах адбылася пастырская сустрэча святароў і кансэкраваных асоб Віцебскай дыяцэзіі
11 лістапада святары, якія нясуць служэнне ў Віцебскай дыяцэзіі, сабраліся на пастырскай сустрэчы ў мёрскай святыні. У межах спаткання адбылася святая Імша, якую ўзначаліў біскуп Віцебскі Алег Буткевіч. У Імшы ўдзельнічаў таксама Апостальскі адміністратар для грэка-католікаў Беларусі архімандрыт Лявонцій Тумоўскі.
Сустрэча распачалася з адарацыі Найсвяцейшага Сакраманту. У гэты час святары і кансэкраваныя асобы мелі магчымасць прыступіць да сакраманту пакаяння і паяднання, што садзейнічала духоўнай падрыхтоўцы да Эўхарыстыі.

Падчас гаміліі ардынарый Віцебскай дыяцэзіі біскуп Алег Буткевіч узгадаў жыццёвы шлях святых Марціна Турскага (успамін 11 лістапада) і Язафата Кунцэвіча (успамін 12 лістапада). Іерарх падкрэсліў, што хоць гэтыя святыя жылі ў розныя часы, аднак і сёння яны з'яўляюцца прыкладам пастырскага служэння для святароў.
Пасля Эўхарыстыі адбылася канферэнцыя, якую прамовіў пробашч парафіі Езуса Міласэрнага ў Віцебску доктар біблійнай тэалогіі ксёндз канонік Валерый Марціноўскі. Святар закрануў тэму аскезы, раскрыўшы яе ролю ў духоўным развіцці.

11 лістапада 25-годдзе святарскага служэння адзначаў доктар біблійнай тэалогіі ксёндз канонік Сяргей Сурыновіч, які амаль 12 гадоў быў пробашчам у Друі, а з 2024 года нясе служэнне ў парафіі святога Антонія Падуанскага ў Віцебску. З нагоды срэбнага юбілею святарства біскуп Алег Буткевіч выказаў словы ўдзячнасці і віншавання ксяндзу Сяргею Сурыновічу.
Завяршылася сустрэча пастырскімі аб’явамі і абмеркаваннем бягучых пытанняў.

Жанна Закрэўская

11.11.2026
Рымска-каталіцкая парафія Унебаўзяцця Найсвяцейшай Панны Марыі
Адрас для карэспандэнцыі:

вул. Паштовая, д.11,
211287 г. Міёры
Віцебская вобласць
Тэлефон: +375 (2152) 41836
е-mail:
kascelmery@gmail.com
Выкарыстанне матэрыялаў дазваляецца пры ўмове спасылкі (гiперспасылкi) на kascelmery.by