Сустрэча святароў і кансэкраваных асоб адбылася ў Мёрах

Парафіяльныя аб'явы Літургічны каляндар Катэхеза Кантакты Відэаматэрыялы

Сустрэча святароў і кансэкраваных асоб адбылася ў Мёрах

10 лістапада ў нашай парафіі прайшла сустрэча святароў і кансэкраваных асоб, якія працуюць на тэрыторыі Віцебскай дыяцэзіі. Такія спатканні праходзяць рэгулярна ў розных парафіях і накіраваныя на ўмацаванне малітоўнай еднасці і рэлігійнае ўзрастанне духавенства і кансэкраваных асоб.

Распачалася сустрэча а 11-ай гадзіне ў цішыні праз асабістую адарацыю Езуса ў Найсвяцейшым Сакраманце. У гэты час была таксама магчымасць для сакраманту споведзі. Апоўдні адбылася святая Імша, якую ўзначаліў ардынарый Віцебскай дыяцэзіі біскуп Алег Буткевіч.

У сваёй гаміліі, разважаючы над словамі Евангелля паводле Мацвея на літургічны ўспамін св. Льва Вялікага, папы і доктара Касцёла, іерарх узняў важныя і актуальныя пытанні для духавенства: "Кім лічаць нас, як святароў, вернікі? Як успрымаюць мяне мае парафіяне? Наколькі маё святарства з'яўляецца адпаведным?"

Пасля Літургіі прайшлі тэматычныя сустрэчы. Канферэнцыю для духавенства на тэму “Духоўная барацьба ў жыцці святара” прамовіў доктар біблійнай тэалогіі кс.Валерый Марціноўскі. У сваім павучанні святар акцэнтаваў ўвагу на неабходнасць пастаяннага духоўнага ўзрастання.

Канферэнцыя для сясцёр прайшла ў катэхетычнай зале. У сваёй прамове айцец Анджэй Юхневіч OMI заахвоціў задумацца над самымі важнымі рэчамі ў жыцці. Святар адзначыў, што цэнтрам нашага жыцця павінен стаць Езус Хрыстус.

Пасля духоўных канферэнцый духавенства і кансэкраваныя асобы змаглі абмеркаваць надзённыя пытанні з біскупам і кіраўнікамі дыяэцэзіяльных структур, а таксама набыць рэлігійную літаратуру і календары на наступны год. Сваю прадукцыю для іх прадставілі выдавецтва “Про Хрысто” і інтэрнэт-крама хрысціянскіх сувеніраў “Добры пастыр”.

Наступная сустрэча святароў і кансэкраваных асоб пройдзе перад Калядамі ў Полацку.

Жанна Закрэўская