Пасхальны Трыдуум

Парафіяльныя аб'явы Літургічны каляндар Катэхеза Кантакты Відэаматэрыялы

Святы Пасхальны Трыдуум

Велікодны або Пасхальны Трыдуум — гэта трохдзённыя набажэнствы на ўспамін пакутаў, смерці і ўваскрасення Хрыста, якія распачынаюцца ўвечары ў Вялікі чацвер і завяршаюцца ў Велікодную нядзелю. Трыдуум — гэта ўрачыстае адзначэнне падзеяў, з якіх складаецца сутнасць нашай веры.

Іх кульмінацыяй з’яўляецца Пасхальная вігілія, якая распачынаецца ўначы ў Вялікую суботу, калі мы святкуем Уваскрасенне Хрыста з мёртвых.

Вялікі чацвер

Шмат гістарычных і літургічных падзей прыпадае на гэты дзень. Перш за ўсё гэта Апошняя Вячэра, падчас якой Езус абмывае ногі вучням і ўстанаўлівае Эўхарыстыю і сакрамант святарства. У гэты ж дзень Езус звяртаецца да вучняў з развітальнаю прамоваю, выкрывае здрадніка і моліцца ў Гетсіманіі. Завяршаецца дзень арыштам Езуса.

У Вялікі чацвер Касцёл нагадвае вернікам пра дзве вялікія цноты — Божую любоў і пакору, каб вызнаўцы Хрыста адпаведна падрыхтаваліся да годнага прыняцця Найсвяцейшага Сакраманту.

Адзначаючы ўстанаўленне Езусам сакрамантаў Эўхарыстыі і святарства, мы дзякуем Богу за дар Эўхарыстыі (Камуніі), у якой прысутнічае Хрыстос, а таксама памятаем і молімся ў гэты дзень за святароў, якіх Бог паставіў на нашым духоўным шляху, выпрошваючы для іх святасць і неабходныя ласкі.

Адразу ж пасля літургіі ў Вялікі чацвер не спяшайцеся ісці да цямніцы Пана, пабудзьце крыху на сваім месцы, бо ў гэты момант адбываецца штосьці вельмі важнае, што звычайна людзі не заўважаюць. А менавіта, калі святар пойдзе ў сакрыстыю, усё, што знаходзіцца на алтары, павінна быць прыбрана. Застанецца толькі пусты, «голы» алтар, не прыкрыты нічым. Гэта важны сімвал, як быццам узялі чалавека і здзерлі з яго шаты. Што і адбываецца насамрэч, бо Хрыстус менавіта пасля гэтай літургіі ў Вялікі чацвер уваходзіць у стан поўнага прыніжэння. Вядома, што Яго ўцелаўленне ўжо было прыніжэннем, але менавіта з моманту Апошняй Вячэры Ён нібы кажа: «Забірайце ўсё. Можаце ўзяць Мяне ўсяго і не таму, што вы гэтага хочаце, а таму, што Я вам гэта дазваляю». Ён сам дазваляе парваць сябе на шматкі, дазваляе такое поўнае прыніжэнне, бо любіць…

Вялікая пятніца

У Вялікую пятніцу Касцёл успамінае муку і смерць нашага Збаўцы Езуса Хрыста, таму хрысціяне павінны душою і сэрцам яднацца з Касцёлам у адзначэнні гэтага дня, які з’яўляецца найважнейшым у справе іх адкуплення; павінны асаблівым чынам разважаць пра муку і смерць Езуса Хрыста, абуджаць у сабе найбольшую любоў да Яго і адчуваць вялікі боль за тое, што нашыя грахі прынеслі Збаўцы столькі пакутаў. Вернікі павінны імкнуцца ў душы падзяляць Яго цярпенне, яднаючы з ім цялеснае вырачэнне, павялічваючы ў гэты дзень строгасць посту і молячыся за ўсіх людзей.

У гэты дзень не цэлебруецца святая Імша, а адбываецца набажэнства, якое мае назву літургія Мукі Пана. Важным момантам набажэнства з’яўляецца адарацыя Крыжа.

У Вялікую пятніцу, пачынаючы ад пантыфікату святога Паўла VI, у Паўсюдным Касцёле праводзіцца так званая Калекта (збор ахвяраванняў) на патрэбы супольнасці Касцёла ў Святой Зямлі. Сёння гэты Касцёл па розных прычынах знаходзіцца ў надзвычай цяжкай сітуацыі.

Кожны вернік, які прыйдзе ў касцёл 18 красавіка, у Вялікую пятніцу, можа прыняць удзел у сёлетняй Калекце і падтрымаць, па меры сваёй магчымасці, хрысціянскія супольнасці ў Святой Зямлі.

У Вялікую пятніцу распачынаецца Навэнна да Божай Міласэрнасці, якая трывае 9 дзён.

Вялікая субота

Вялікая Субота — гэта дзень, калі ўвесь Хрыстовы Касцёл прабывае ў жалобе і святым маўчанні перад грабніцай свайго Пана і Збаўцы Езуса Хрыста. На працягу ўсяго гэтага дня вернікі прыходзяць у касцёл, каб у малітоўнай цішыні пабыць сам-насам з Езусам у грабніцы.

У гэты дзень у нашай святыні з 9-ай гадзіны раніцы да 18-ай гадзіны вечара будзе адбываецца адарацыя Езуса ў Эўхарыстыі да якой усіх заахвочваем. Знайсці час на адарацыю Збаўцы, які аддаў за нас сваё жыццё, пакліканы сёння кожны хрысціянін.

Вялікая Субота — таксама дзень падрыхтоўкі да святкавання, калі гатуюцца і бласлаўляюцца традыцыйныя велікодныя стравы. У іх знайшлі адлюстраванне асноўныя элементы пасхальнага сэдэру — старазапаветнай пасхальнай вячэры (гл. Зых 12, 1–8). Асвячэнне страў у нашай святыні адбудзецца а 11-ай, 13-ай, 15-ай і 18-ай гадзіне.

У гэты дзень вернікі таксама традыцыйна захоўваюць пост, як і ў Вялікую пятніцу.

Пасхальная Вігілія

У ноч з суботы на нядзелю паводле найстаражытнейшай традыцыі адбываецца чуванне (лац. вігілія) на ўшанаванне Пана. Вігілія гэтай ночы, якая з’яўляецца найважнейшай і найбольш значнай з усіх урачыстасцяў, уключае шмат прыгожых старадаўніх абрадаў. Пачынаецца яна з Літургіі святла, падчас якой адбываецца благаслаўленне агню і пасхала — вялікай свечкі, што з’яўляецца сімвалам Хрыста і важным элементам літургіі. Затым спяваецца старадаўні грыгарыянскі спеў Exsultet, у якім абвяшчаецца радасная вестка пра ўваскрасенне Пана, пасля чаго ў Літургіі Слова, значна больш працяглай, чым звычайна, Касцёл разважае пра цуды, ад стварэння свету ўчыненыя Богам дзеля збаўлення чалавецтва. Трэцяя частка Вігіліі — гэта Літургія Хросту, падчас якой асвячаецца вада і адбываецца хрост тых, хто рыхтаваўся прыняць гэты сакрамант, а ўсе астатнія вернікі, трымаючы ў руках запаленыя свечкі, аднаўляюць свае хросныя абяцанні. Нарэшце, адбываецца Эўхарыстычная Літургія, у якой успамінаем смерць і ўваскрасенне Пана праз складанне ў постацях хлеба і віна ахвяры Яго Цела і Крыві. Пасля святой Імшы на досвітку адбываецца рэзурэкцыйная працэсія.

Паводле каталіцкіх сайтаў аve-maria.by, catholic.by