Пальмовая нядзеля распачынае ў Каталіцкім Касцёле Вялікі тыдзень, апошні тыдзень падрыхтоўкі да Змёртвыхпаўстання Хрыста. Гэты дзень мае шэраг адмысловых традыцый, якія адрозніваюць яго ад звычайнай нядзельнай Імшы. Многія з іх маюць шматвекавую гісторыю, заснаваныя на апісаных у Евангеллях падзеях і сягаюць далёка ў ранні Касцёл. Гэтыя традыцыі накіраваныя на больш глыбокае перажыванне Мукі Хрыста. Яны надзвычайным спосабам акунаюць нас у евангельскія падзеі і дапамагаюць у разважанні пра прыгажосць і веліч велікоднай таямніцы.
Вось 7 такіх традыцый і іх значэнне.
Чаму Імша пачынаецца з працэсіі?
Акрамя таго, што працэсія начале са святаром пераймае ўваходу Езуса ў Ерузалем, варта адзначыць, што алтарная прастора па сваёй сутнасці сімвалізуе неба, бо ў Эўхарыстыі, якая здзяйсняецца на алтары, прысутнічае Сам Хрыстос.
Акрамя таго, алтар часта прыпадняты на некалькі прыступак над астатняй прасторай касцёла. Гэта таксама мае сімвалічнае значэнне: ён узводзіць нашы погляды (і сэрца) да Бога, але таксама нагадвае пра ўзыходжанне Езуса на Галгофу. Святар ўзыходзіць на "містычную" Галгофу, каб прынесці ахвяру Імшы, удзельнічаючы ў ахвяры Хрыста на крыжы.
Чаму ўдзельнікі працэсіі нясуць галінкі вярбы, пальмы ці іншых раслін?
Біблейскія даследчыкі часта перакладаюць слова, якое пазначае галіны, якія людзі выкарыстоўвалі падчас урачыстага ўваходу Езуса, абагульнена. Напрыклад, у Евангеллі ад Мацвея сказана: "Мноства людзей дарогу перад Ім высцілалі сваімі плашчамі, а іншыя зразалі з дрэў галіны і клалі Яму пад ногі" (Мц. 21:8).
Па сутнасці, калі пальмавыя галіны (а менавіта іх, верагодна, клалі пад ногі Езусу ў той дзень) недаступныя, цалкам дапушчальна выкарыстоўваць любыя іншыя прыдатныя расліны для працэсіі Вербнай нядзелі.
Гэтыя галіны — сімвал, які нагадвае пра неабходнасць адкрыць сваё сэрца перад Хрыстом, дазволіўшы Яму ўвайсці ў самыя патаемныя глыбіні нашай душы. Таму, нават калі вы прыйшлі на Імшу без якіх-небудзь раслін, вы ўсё роўна можаце далучыцца да духоўнага сэнсу Вербнай нядзелі.
Чаму святары апранутыя ў чырвонае?
Чырвоны колер — колер крыві, які сімвалізуе любоў, агонь, муку і ахвяру. Літургічныя ўборы гэтага колеру апранаюць у Вербную нядзелю, Вялікую пятніцу, а таксама ў любы дзень, звязаны з пакутамі Езуса, ва ўрачыстасць Пяцідзясятніцы і ў дні памяці тых, хто памёр за веру (пакутнікаў).
