У Верхнядзвінску ўшанавалі бласлаўлёных мучанікаў з Беразвечча

Парафіяльныя аб'явы Літургічны каляндар Катэхеза Кантакты Відэаматэрыялы

У Верхнядзвінску ўшанавалі бласлаўлёных мучанікаў з Беразвечча

13 чэрвеня ў парафіі Нараджэння Найсвяцейшай Панны Марыі ў Верхнядзвінску адбылася ўрачыстая святая Імша ў гонар бласлаўлёнага кс.Мечыслава Багаткевіча, мучаніка Другой сусветнай вайны, які перад смерцю нёс сваё служэнне ў Дрысе (цяпер г.Верхнядзвінск).

У 1999 годзе папа Ян Павел ІІ абвесціў бласлаўлёнымі 108 мучанікаў, сярод іх ксяндзы Мечыслаў Багаткевіч, Станіслаў Пыртак і Уладзіслаў Мацьковяк, якія былі растраляныя немцамі ля вёскі Барок непадалёку ад Глыбокага. Святароў-мучанікаў з Беразвечча, а таксама айцоў-марыянаў з Росіцы ў літургічным календары Віцебскай дыяцэзіі ўзгадваюць 12 чэрвеня. У Верхнядзвінскай парафіі, са згоды біскупа Алега Буткевіча, склалася пабожная традыцыя ўшаноўваць у гэты дзень памяць пра самаадданую працу Богу і Касцёлу бласлаўлёнага ксяндза Мечыслава Багаткевіча.

У прывітальным слове пробашч парафіі ксёндз Аляксандр Грыцкевіч заўважыў, што захаванне і ўшанаванне памяці пра святароў, якія працавалі на нашых землях і далі прыклад ахвярнага служэння Пану Богу, з'яўляецца важным момантам духоўнага жыцця. Святар падзякаваў усім, хто сабраўся на супольную малітву і прадставіў святароў, якія прыбылі на свята.

Ва ўрачыстай Літургіі бралі ўдзел Генеральны вікарый Віцебскай дыяцэзіі ксёндз пралат Францішак Кісель, кс. Юрый Жаўняровіч з Іказні, кс. Антон Лагунёнак з Дунілавічаў. Узначаліў Эўхарыстыю новапрэзбітэр кс. Андрэй Януль. Паслугу ў канфесіянале аказваў дэкан Міёрскі кс.Андрэй Кулік.

Па традыцыі шаноўных гасцей парафіяне сустрэлі хлебам-соллю.

Гамілію прамовіў кс.Антон Лагунёнак, пробашч парафіі Найсвяцейшай Тройцы ў Дунілавічах, дзе, у свой час, быў ахрышчаны кс.Мечыслаў Багаткевіч. Звяртаючыся да вернікаў, святар прапанаваў задумацца над тым, што мог адчуваць кс.Мечыслаў, калі знаходзіўся ў камеры смяротнікаў і ведаў, што заўтра адыдзе да Пана.

Як чалавек, ён напэўна адчуваў страх, але не страх смерці, які можа ўзнікаць ад грахоўнасці жыцця. Ён адчуваў страх, які паходзіць ад Духа Святога і называецца бояззю Божай. Ксёндз Мечыслаў разумеў, што аддае сваё жыццё на карысць свайго збаўлення. Аб гэтым сведчыць яго запісы пакінутыя ў брэвіярыіі перад смерцю: “У гэтую ноч ідзем на смерць я і мае браты ў святарстве з Іказні. Іду спакойна і маю надзею на Бога, што мае цярпенні і мая кроў заслужаць мне збаўленне. Відаць такая воля Божая, бо я мог уцячы з Дрысы, таксама і адсюль, але баяўся, каб не парушыць Божых намераў і каб пазней пры смерці не мець дакораў сумлення. Ад усяго сэрца я прабачаю ўсіх маіх ворагаў, хацелася б для іх усіх выслужыць неба.”

Святары перад смерцю паспавядаліся адзін у аднаго, каб быць гатовымі на сустрэчу з Панам, пасля чаго адправілі святую Імшу.

"Няхай святы страх і святасць жыцця, на ўзор бласлаўлёнага ксяндза Мечыслава Багаткевіча, вядуць нас да Божага збаўлення" — пажадаў, завяршаючы прамову, святар.

Пасля малітвы вернікаў адбылося прынашэнне дароў. Сімвалы жыцця, служэння і мучаніцтва кс.Мечыслава, а таксама сімвалы Эўхарыстыі: свечка, Евангелярый, крыж, эўхарыстычныя хлеб і віно — ўсё гэта было складзена на алтар.

Напрыканцы Імшы ксёндз Аляксандр Грыцкевіч выказаў словы ўдзячнасці святарам і вернікам за супольную Эўхарыстыю і ўдзел ва ўрачыстасці. Ад імя парафіі святар падараваў абраз бласлаўлёнага Мечыслава Багаткевіча кс.Антону Лагунёнку з нагоды імянінаў і новапрэзбітэру кс.Андрэю Янулю.

Узгадваючы бласлаўлёных мучанікаў з Беразвечча, сімвалічным стала выкананне песні "Малюся за цябе, Беларусь", якой завяршылася святая Імша. Урачыстую літургію ў гэты дзень сваімі спевамі ўпрыгожылі вернікі з Верхнядзвінска і Міёраў пад кіраўніцтвам арганісткі Яўгеніі Баговіч.

Завяршылася ўрачыстасць прыміцыйным бласлаўленнем, якое ўдзяліў новапрэзбітэр кс.Андрэй Януль.

Жанна Закрэўская

13.06.2026