Вігілія ў святую ноч

Парафіяльныя аб'явы Літургічны каляндар Катэхеза Кантакты Відэаматэрыялы

Пасхальная вігілія ў Святую ноч

З наступленнем цемры ў Вялікую суботу ў нашай святыні прайшла самая галоўная хрысціянская літургія на працягу года — Пасхальная вігілія ў Святую ноч. Гэтая літургія мае ў сабе шэраг духоўнага багацця і сімволікі новага жыцця ў Хрысце.

Літургія святла распачалася перад касцёлам, дзе адбылося асвячэнне агню, ад якога потым быў запалены пасхал — вялiкая свечка, якая сiмвалiзуе ўваскрослага Хрыста. У працэсiі са словамі «Святло Хрыста», пасхал быў унесены ў святыню. Вернікі запалілі ад яго полымя свае свечкі і стоячы слухалі спеў “Exsultet” («Абвяшчэнне Пасхі») — гэта старажытны гімн, які праслаўляе Божы план збаўлення і які раней спяваўся падчас хросту.

У Літургіі Слова, значна больш працяглай, чым звычайна (яна складаецца з дзевяцi чытанняў Святога Пiсання) разважалі пра цуды ўчыненыя Богам дзеля збаўлення чалавецтва.

Пробашч парафіі ксёндз Андрэй Кулік у сваёй гаміліі заахвоціў прыгледзіцца да літургіі, якую перажываем і некаторых яе сімвалаў. У вігілію Змёртвыхпаўстання выкарыстоўваецца пасхал. Святар адзначае на ім знак крыжа і лічбы бягучага года, а таксама грэцкія літары: альфа і амега. На пасхале мы таксама бачым пяць сімвалічных цвікоў — сімвал мукі Хрыста і Яго ран. Смерць Езуса прынесла нам надзею на збаўленне. Такім чынам, пасхал — гэта сімвал Хрыста, святло якое раз'ясняе цемру жыцця без Бога і Хрыста, які застаецца з намі аж да сканчэння свету.

Наступным важным сімвалам літургіі з'яўляецца вада, якая ў залежнасці ад кантэксту набывае розную сімволіку на старонках Бібліі. Воды патопу знішчаюць усё жывое з паверхні зямлі. Біблійны аўтар прадстаўляе іх, як першую спробу ачышчэння зямлі ад граху і маральнай сапсаванасці. Вада — гэта таксама пачатак новага жыцця. Такім чынам сёння, калі адновім абяцанні святога хросту, мы будзем акропленыя вадой, што сімвалізуе нашу чысціню і гатоўнасць падысці да эўхарыстычнага стала, каб спажываць Цела Хрыста.

З запаленай пасхальнай свечкай мы ўвайшлі сёння ў касцёл і пачулі словы: "Святло Хрыста!". Хрыстус — Ён сам з'яўляецца святлом, што асвятляе кожнага чалавека, які на свет прыходзіць — кажа нам св. Ян апостал. Мы павінны ісці за Хрыстом робячы штодзённа правільны выбар у святле сваёй веры і даючы сведчанне аб сваёй прыналежнасці да Збаўцы. Вось заданне кожнага з нас.

Падчас Літургіі хросту адбылося асвячэнне вады, а затым, трымаючы ў руках запаленыя свечкі, усе вернікі ў касцёле аднавілі свае хросныя абяцанні праз адрачэнне ад зла і вызнанне веры ў Бога, адзінага ў трох Асобах — Айца і Сына, і Святога Духа.

Эўхарыстычная літургія завяршылася ўрачыстай рэзурэкцыйнай працэсіяй з Найсвяцейшым Сакрамантам. Разам з уваскрослым Панам радасна абвяшчаючы Яго Змёртвыхпаўстанне тройчы абыйшлі вакол святыні.

Пасля святой Імшы пробашч парафіі ксёндз Андрэй Кулік выказаў словы ўдзячнасці ўсім, хто прыняў удзел ва ўрачыстасці і набажэнствах Пасхальнага трыдуума, а таксама прычыніўся да перадсвяточных спраў па прыбіранні і аздабленні касцёла. На заканчэнне ксёндз Андрэй пажадаў радаснага і пабожнага перажывання Вялікадня.

Жанна Закрэўская
31.03.2024