Вігілія ў святую ноч

Парафіяльныя аб'явы Літургічны каляндар Катэхеза Кантакты Відэаматэрыялы

Пасхальная вігілія ў Святую ноч

З наступленнем цемры ў Вялікую суботу ў нашай святыні прайшла самая галоўная хрысціянская літургія на працягу года — Пасхальная вігілія ў Святую ноч. Паводле найстаражытнейшай традыцыі ў гэтую ноч, калі Хрыстус уваскрос з памерлых, адбываецца чуванне, што ў перакладзе з лацінскай мовы і азначае слова «вігілія».

Святы Аўгустын казаў, што гэтая літургія — «маці ўсіх святых вігілій», бо яна з’яўляецца літургічным успамінам той ночы, калі Збаўца ўваскрос з памерлых. Яе правобразам у Старым Запавеце была ноч, у якую Бог вызваліў свой народ з егіпецкай няволі.

Першая частка гэтага начнога чування называецца Літургіяй святла. З асвячэння новага агню, ад якога запальваецца вялікая васковая свечка — пасхал — сімвал уваскрослага Хрыста, распачынаецца святкаванне Змёртвыхпаўстання Пана. У працэсiі са словамі «Святло Хрыста», пасхал быў унесены ў святыню. Вернікі запалілі ад яго полымя свае свечкі і разам слухалі спеў “Exsultet” («Абвяшчэнне Пасхі») — старажытны гімн, які праслаўляе Божы план збаўлення і які раней спяваўся падчас хросту.

Хрысціянская Пасха мае непасрэдную духоўную сувязь са старазапаветным святам Пэсаху, што яскрава відаць з біблейскіх чытанняў, якія гучаць у другой частцы Вігіліі — Літургіі слова. Само слова Пасха — па-габрэйску Пэсах — азначае пераход. Гэтае свята, устаноўленае ў памяць зыходу сыноў Ізраэля з егіпецкай няволі, пасля ўваскрасення Хрыста набыло іншае значэнне. У гэты дзень хрысціяне святкуюць свой канчатковы і незваротны зыход з няволі граху і смерці і пераход да новага жыцця ў Хрысце, да жыцця ў свабодзе Божых дзяцей, якімі мы становімся праз хрост.

Пробашч парафіі ксёндз Андрэй Кулік у сваёй гаміліі падкрэсліў, што літургія Вігіліі пасхальнай напоўнена шматлікімі сімваламі, такімі як агонь, пасхальная свечка, вада. Усе яны кіруюць нашу ўвагу на Хрыста, якога праз гэтыя сімвалы Касцёл нам паказвае як святло свету і жывую ваду. Словы Езуса, у якіх Ён сам называе сябе святлом свету і кажа, што кожны, хто ідзе за Ім не загіне ў цемры, а вада, якую Ён дае, натоліць смагу чалавека і той ужо не будзе прагнуць, найбольш раскрываюцца ў Пасхальнай літургіі, якую мы зараз перажываем.

Чытанні Старога Запавету прыпамінаюць нам асноўныя моманты гісторыі збаўлення і сярод іх мы чуем словы Бога: "Няхай стане святло". Святло — гэта жыццё, гэта ўпэўненасць, што я не блукаю, не згубіў дарогу. Святло дае кожнаму жывому арганізму магчымасць жыць і развівацца, а чалавеку — яшчэ і доступ да праўды. Святло — гэта магчымасць убачыць і належным чынам ацаніць дабро.

Молімся сёння, каб Пан дазволіў нам адчуць радасць прабывання ў Яго святле. Каб мы самі сталі тымі, хто нясе гэтае святло свету, каб праз Касцёл і нас асабіста хвала Хрыста ўваходзіла ў свет і асвятляла яго.

Падчас Літургіі хросту адбылося асвячэнне вады, а затым, трымаючы ў руках запаленыя свечкі, усе вернікі ў касцёле аднавілі свае хросныя абяцанні праз адрачэнне ад зла і вызнанне веры ў Бога, адзінага ў трох Асобах — Айца і Сына, і Святога Духа. Літургія Пасхальнай вігіліі дае магчымасць усім вернікам нанова і ўжо свядома перажыць свой уласны хрост. Гэта адбываецца праз акрапленне асвечанай вадой.

На заканчэнне Эўхарыстыі, ва ўрачыстай рэзурэкцыйнай працэсіяй з Найсвяцейшым Сакрамантам, тройчы абыйшлі вакол касцёла, радасна абвяшчаючы наваколлю Змёртвыхпаўстанне Хрыста.

Пасля святой Імшы пробашч парафіі ксёндз Андрэй Кулік выказаў словы ўдзячнасці ўсім, хто прыняў удзел ва ўрачыстасці і набажэнствах Пасхальнага трыдуума, а таксама прычыніўся да перадсвяточных спраў па прыбіранні і аздабленні касцёла. На заканчэнне ксёндз Андрэй пажадаў радаснага і пабожнага перажывання Вялікадня.

Жанна Закрэўская
20.04.2025