Чарговы раз мы рыхтуемся да святкавання самага галоўнага свята нашай веры — урачыстасці Змёртвыхпаўстання Пана нашага Езуса Хрыста. Давайце сёння спынімся ў перадсвяточнай мітусні і запытаем у Збаўцы: "Пане, вось я прыкладаю шмат намаганняў, каб годна сустрэць Свята: прыбіраю дом, рыхтую ежу, чакаю гасцей і сам збіраюся наведаць сяброў, можа нават прыступлю да споведзі… А што хочаш Ты? Як Ты хацеў бы святкаваць са мной?"
Адзін з магчымых адказаў знойдзем у пасланні апостала Паўла да Эфесцаў: "Адкіньце ад сябе старога, а апраніцеся ў новага чалавека, створанага паводле Бога" (пар. Эф.4, 22-24). Няхай нам хопіць у гэтыя важныя для нашай душы дні веры і часу наведаць касцёл і задумацца над гэтым кароткім заахвочваннем апостала Паўла.
Хрыстос уваскрос! Сапраўды ўваскрос!
Радасных, напоўненых супакоем і глыбокіх перажываннем Велікодных святаў усім Вам жадаюць кс. Андрэй Кулік і святары Міёрскага дэканату
