Вялікая пятніца

Парафіяльныя аб'явы Літургічны каляндар Катэхеза Кантакты Відэаматэрыялы

Вялікая пятніца

У Вялікую пятніцу не цэлебруецца святая Імша, а адбываецца набажэнства, якое мае назву літургія Мукі Пана. У гэты дзень Першасвятар нашага збаўлення Хрыстус, паміраючы на крыжы, прынёс на ім крывавую ахвяру ўміласціўлення Нябеснаму Айцу за грахі ўсіх людзей, таму ў гэты дзень асаблівым чынам мы ўшаноўваем Крыж.

Пасля Крыжовай дарогі, якую прайшлі разам, каб яшчэ раз праз супольную малітву далучыцца да пакутаў Езуса на крыжы, у цішыні, без спеву і прывітання распачалася Літургія Мукі Пана. Пад гукі трашчотак працэсія ўвайшла ў касцёл і накіравалася да алтара. У Вялікую пятніцу святары кладуцца перад алтаром крыжам і пэўны час моляцца ў маўчанні разам з вернікамі, якія кленчаць.

Падчас літургіі Слова пачулі ўрывак з Евангелля паводле Яна, які апісвае Муку Пана. У гаміліі ксёндз Алег Зямчонак падкрэсліў, што сёння мы прыходзім ў святыню каб угледзецца не толькі вачыма, але і сэрцам узбаўчыя і пакутніцкія раны Хрыста, каб глыбей адчуць і зразумець, якой цаной было дадзена кожнаму з нас прабачэнне і ласка збаўлення.

Літургію Слова прадоўжыла доўгая малітва ў 10-ці розных інтэнцыях.

Пасля малітвы настаў момант адарацыі Крыжа. Міністранты ўнеслі да алтара крыж, які быў закрыты ў фіялетавую тканіну. Ксёндз Алег Зямчонак паступова здымаў тканіну з крыжа і тройчы спяваючы: «Вось дрэва крыжа, на якім памёр Збаўца свету» ўздымаў яго ўгару. Затым святары, міністранты і вернікі ўшанавалі крыж праз цалаванне.

За ўдзел у адарацыі Крыжа ў Вялікую пятніцу можна атрымаць поўны адпуст.

Пасля ўдзялення Камуніі святыя Эўхарыстычныя дары былі ў працэсіі перанесеныя ў сімвалічную грабніцу, дзе яны застануцца да заканчэння Пасхальнай Вігіліі.

Паступова ўсё святло ў касцёле было загашана і толькі асветленая грабніца стала месцам адарацыі, якая доўжылася да 22-ой гадзіны.

Жанна Закрэўская
18.04.2025