Завяршылася выстава "Хрыстос нарадзіўся!"
6 студзеня ва ўрачыстасць Аб'яўлення Пана на святой Імшы а 12-ай гадзіне былі падведзены вынікі выставы малюнкаў і стаенак "Хрыстос нарадзіўся!", якая праходзіла ў нашай святыні з 24 снежня па 6 студзеня. У выставе прынялі ўдзел 18 дзяцей. Усе ўдзельнікі, якія былі на святой Імшы, атрымалі салодкія падарункі.
Разважаючы над словамі Евангелля на ўрачыстасць Аб'яўлення Пана, пробашч парафіі ксёндз Андрэй Кулік заўважыў: "Святкуючы сёння адну з найстарэйшых урачыстасцяў, маем вялікую адказнасць і абавязак перад новымі пакаленнямі. Я таксама, як калісьці мудрацы з ўсходу, павінен пакланіцца Хрысту — гэта абавязак прапаведвання Божага Слова, евангелізацыі і катэхізацыі, якая пачынаецца з найбліжэйшых, у сямейным коле. Бацькі вучаць дзяцей здзяйсняць знак крыжа, малітве, уласным прыкладам паказваючы яе патрэбу  ў штодзёным жыцці, ў наведванні касцёла ў нядзелю усё гэта прыбліжае чалавека да Бога і заахвочвае пакланіцца Хрысту, вызнаўшы веру ў Яго ў свядомым узросце".

Напрыканцы Імшы адбылося традыцыйнае асвячэнне вады і крэйды, якой мы пазначаем свае дамы, на знак прыналежнасці да Святога Касцёла.
Пасля Літургіі прайшло падвядзенне вынікаў выставы. Пробашч парафіі ксёндз Андрэй Кулік падзякаваў дзецям за ўдзел у выставе, пажадаў ім творчых поспехаў і ўручыў салодкія падарункі. Завяршылася імпрэза агульным фотаздымкам.
У гэтым годзе на выставе былі прадстаўлены малюнкі, выцінанкі, вырабы з паперы і тканіны. Усе работы заслугоўваюць ўвагі, бо кожная вылучаецца мастацкім густам і высокім ўзроўнем выканання з улікам узросту. Многія ўдзельнікі выставы займаюцца ў раённай школе мастацтваў, дзе раскрываюць і развіваюць свае таленты. Хахлова Арына, Граковіч Дар'я, Дзям'янава Паліна, Кашаўкіна Дар'я, Плотнікаў Яраслаў зрабілі разнастайных і вельмі прыгожых анёлкаў з паперы, а Шульга Ангеліна з тканіны. Таропіна Аксана і Кулеш Паліна падзяліліся майстэрствам вырабу выцінанкі.  Арыгінальнае каляднае ўпрыгожванне ў выглядзе зоркі з анёламі зрабіла Курдутава Агата. Падзява Дана, Мятла Елізавета, Пацеенак Паліна, Арлюкевіч Дамініка і сёстры Махлінец Марыя і Ксенія аддалі перавагу малюнку, а старэйшыя дзяўчаты Рубанік Ульяна і Пугаўка Анастасія стварылі сапраўдныя карціны-шэдэўры.

На выставе была толькі адна стаенка, якую ў выглядзе елкі зрабіў разам з мамай адзін з малодшых яе ўдзельнікаў Арлюкевіч Арцём.

Жанна Закрэўская
Адрас для карэспандэнцыі:

вул. Паштовая, д.11,
211287 г. Міёры
Віцебская вобласць
Тэлефон: +375 (2152) 41836
е-mail:
kascelmery@gmail.com
Выкарыстанне матэрыялаў дазваляецца пры ўмове спасылкі (гiперспасылкi) на kascelmery.by
Рыма-каталіцкая парафія Унебаўзяцця Найсвяцейшай Панны Марыі