Фестываль "Зорка Бэтлеема"

Парафіяльныя аб'явы Літургічны каляндар Катэхеза Кантакты Відэаматэрыялы

У Мёрах прайшоў дыяцэзіяльны фестываль каляднай песні “Зорка Бэтлеема”

4 студзеня ў Цэнтры культуры і народнай творчасці адбыўся чарговы фестываль каляднай песні "Зорка Бэтлеема". На святочную імпрэзу сабраліся госці з розных куточкаў Віцебскай дыяцэзіі: Глыбокага, Браслава, Варапаева, Полацка, Наваполацка, Віцебска. Ганаровым госцем свята стаў Яго Эксцэленцыя біскуп Віцебскі Алег Буткевіч.

Нягледзячы на халоднае надвор'е, у зале было цёпла і ўтульна. А 10-ай гадзіне вядучыя імпрэзы Анастасія Бадун і кс.Алег Зямчонак распачалі святочную праграму.

На пачатку з прывітальным словам да прысутных звярнуўся біскуп Алег Буткевіч. Яго Эксцэленцыя адзначыў, што ў гэтую прыгожую пару года, калі ўвесь Каталіцкі Касцёл святкуе Божае Нараджэнне, мы збіраемся разам, каб перажыць наноў гэтую вялікую радасць. Выкарыстоўваючы свой талент і Божае натхненне, дзеці і моладзь нашай Віцебскай дыяцэзіі сёння далей прадаўжаюць праслаўляць нованароджанага Збаўцу.

Перад бласлаўленнем, іерарх пажадаў удзельнікам конкурсу і ўсім прысутным поспехаў не толькі на сцэне але і ў паўсядзённым жыцці.

Пасля супольнай малітвы, выступленне распачалі прадстаўнікі парафіі Святога Духа з Віцебска, якія ўпершыню былі на нашым фестывалі. Дзіцячы гурт ў складзе Канцовай Марыі, Касцючэнка Яна і Шыцько Аляксея выканалі тры песні "У Бэтлеем за пастушкамі", "Любоў з Нябёсаў" і "История Рождества". Юныя таленты суправаджалі сваё выступленне жывой музыкай — ігрой на укулелі (маленькая гітара на 4 струны, - заўв. аўт.).

Праграму выступлення прадоўжыла парафія св.Андрэя Баболі з Полацка. У выкананні Дашкевіч Веранікі і Коц Мар'яны прагучалі цудоўныя музычныя творы. Дзяўчаты ігралі разам і паасобку. Ігра на цымбалах і клавішах уразіла не толькі гледачоў, але і журы. Па выніках конкурсу ў намінацыі "Інструментальная творчасць" ва ўзроставай катэгорыі "Дзеці" Коц Мар'яна (цымбалы) атрымала дыплом ІІ ступені, Дашкевіч Вераніка (клавішы) адзначана дыпломам ІІІ ступені.

Суцэльную і змястоўную праграму з канферансам (Якаўлеў Філіп) прадставіла парафія Найсвяцейшага Сэрца Езуса з Наваполацка. Мяцеліца Марыя і Мазынская Кацярына парадавілі гасцей свята цудоўнай ігрой на скрыпцы, а дзіцячы гурт заспяваў песні "Зорка" і "Як прыбеглі пастухі ў Бэтлеем". Журы было адзінагалосным: дыплом І ступені ў намінацыі "Інструментальная творчасць" ва ўзроставай катэгорыі "Дзеці" атрымала Мазынскай Кацярына, а дзіцячы гурт адзначаны дыпломам ІІІ ступені.

Пасля невялікага перапынку праграму працягнулі артысты з парафіі Святога Міхала Арханёла з Варапаева. Халдзей Макар на клавішах выканаў кампазіцыю з калядных мелодый, а дзяўчаты Мацкевіч Кіра і Казаровец Ульяна заспявалі сола, ды так цудоўна, што абедзве адзначаны дыпломамі: Казаровец Ульяна—дыпломам ІІ ступені ва ўзроставай катэгорыі "Моладзь", Мацкевіч Кіра — дыпломам І ступені ва ўзроставай катэгорыі "Дзеці".

Парафія Найсвяцейшай Тройцы з Глыбокага прадставіла на фестывалі сола, а таксама дзіцячы і моладзевы гурт. Артысты падрыхтавалі дынамічную і захапляльную праграму, ды ўзялі з сабою вялікую і моцную групу падтрымкі. Маленькія анёлкі Раманчук Дзіяна, Вавінская Вераніка і Шаршунс Мацвей цудоўна заспявалі песню "Глёрыя". Кацярына Дземідовіч, якая выступала сола ва ўзроставай групе "Моладзь", зачаравала спевам "У гэту святую ноч", а моладзевы гурт, пад суправаджэнне жывой інструментальнай музыкі, падаравалі гледачам песню "На Бэтлеем сыходзіць ноч". Вынік ашаламляльны — усе ўдзельнікі атрымалі дыпломы І ступені.

Дзіцячы гурт з парафіі Нараджэння Маці Божай у Браславе заспявалі калядку "Граем Пану", ды так выдатна, што журы без сумненняў прызначылі ім дыплом ІІ ступені.

Завяршылі конкурсную праграму гаспадары фестывалю — дзеці і моладзь нашай мёрскай парафіі, якія выступілі ў трох намінацыях. Распачаў праграму Шамёнак Аляксандр (кіраўнік Таццяна Бялевіч). Ён на высокім узроўні выканаў "Авэ Марыя" Ф.Шуберта і адзначаны дыпломам І ступені.

Далей выступілі дзеці. Рыхтавала да конкурсу маленькіх артыстаў Яўгенія Баговіч, якая адказна і крэатыўна падыйшла да сваёй справы. Сола Бондар Вольгі ў суправаджэнні мініяцюры ўскалыхнула залу і непакінула раўнадушным журы. Вынік — дыплом ІІ ступені. Гурт-дуэт Падзявы Даны і Бунта Караліны, пад акампаніменты Валеўка Максіма і Шамёнка Аляксандра, выканаў песню Андрэя Даргеля "Ціха ноччу ў Бэтлееме". Ужо вядомыя з мінулага года гурты "Званочкі" і "Зорачкі" парадавалі цудоўнымі калядкамі.

Пасля выступленняў для журы настаў час адказнай і напружанай працы. Сёстры-служабнічкі з Віцебска Ёнаша Мровец і Люцына Мусёл, пад кіраўніцтвам старшыні журы доктара тэалогіі ксяндза Сяргея Сурыновіча, дастойна справіліся з даручанай справай.

І, нарэшце, хвалюючы момант падвядзення вынікаў. У гэтым годзе была вялікая колькасць удзельнікаў у намінацыі гурт і інструментальная творчасць ва ўзроставай катэгорыі "Дзеці", таму не ўсе атрымалі прызавыя месцы, аднак гэта не нагода для роспачы, а стымул для далейшага росту.

Падводзячы вынікі конкурсу, біскуп Алег Буткевіч выказаў словы ўдзячнасць усім, хто да яго прычыніўся: канкурсантам, кіраўнікам груп, святарам парафій-удзельніц, валанцёрам. Асаблівыя словы ўдзячнасці прагучалі ў бок нашай парафіі за арганізацыю і правядзенне фестывалю, а таксама ў бок дабрачыннага каталіцкага таварыства Карытас за фінансавую падтрымку.

Усе ўдзельнікі конкурсу атрымалі падарункі і станоўчыя эмоцыі, а завяршылася свята агульным фотаздымкам з біскупам.

Жанна Закрэўская, тэкт, фота, відэа
Марына Сінкевіч, Сatholicnews.by, фота
Леанід Юрык, Сatholicnews.by, відэа мёрскай парафіі

Гісторыя фестывалю

Мёры

Віцебск

Варапаева

Браслаў

Глыбокае

Полацк

Наваполацк