Юбілейны год (Annus Jubilaeus), ці інакш: Святы год (Annus Sanctus) – гэта магчымасць, якую дае вернікам Касцёл для ўмацавання веры. Юбілейны год заўсёды ўспрымаўся як час для прымірэння з Панам Богам, вяртання да Бога – Крыніцы жыцця і любові; час узаемнага прабачэння і аднаўлення любові ў Хрысце; час ачышчэння душы і духоўнага адраджэння.
Каб даць магчымасць вернікам скарыстацца ласкамі Юбілею, з нагоды той ці іншай гадавіны Адкуплення чалавецтва, адметнымі падзеямі ў жыцці Касцёла, па просьбе вернікаў або ў знак удзячнасці за атрыманыя ласкі, Касцёл абвяшчае пазачарговыя Надзвычайныя Юбілеі.
Юбілейны Год заўсёды абвяшчае Папа. З гэтай нагоды выдаецца була, у якой распавядаецца пра ўмовы яго правядзення і духоўныя плёны гэтага Юбілею. Надзвычайнымі Святымі гадамі ў мінулым стагоддзі сталі 1933 год, абвешчаны Піем XI з нагоды 1900-годдзя Адкуплення, і 1983 год, абвешчаны св. Янам Паўлам ІІ у 1950-ю гадавіну Адкуплення.
