У Удзеле ўрачыста адчынілі Сялібу Беззаганнай

Парафіяльныя аб'явы Літургічны каляндар Катэхеза Кантакты Відэаматэрыялы

У Удзеле ўрачыста адчынілі Сялібу Беззаганнай

3 мая падчас правядзення чарговага Уікенда з Марыяй у Мястэчку Беззаганнай у Удзеле адбылася ўрачыстая падзея — біскуп Віцебскі Алег Буткевіч у прысутнасці шматлікі святароў і вернікаў асвяціў Сялібу Беззаганнай. Рэалізацыя праекта "Дом усіх" стала магчымай дзякуючы айцам-францішканам і моладзі з розных куткоў Беларусі.

Мястэчкам Беззаганнай або беларускім Непакалянавым у Удзеле айцы-францішкане апякуюцца з 2000 года. Адным з накірункаў іх дзейнасці з'яўляецца апека над дзецьмі і моладдзю. Пачынаючы з кастрычніка 2022 года тут штомесяц праходзяць спатканні для маладых людзей пад назвай «Weekend (уік-энд) з Марыяй». Моладзь з розных куточкаў Беларусі збіраецца разам, каб маліцца і праслаўляць Беззаганную Панну, паглыбляць веру і проста разам бавіць час. З кожным разам жадаючых трапіць на такія сустрэчы становіцца ўсё больш. Таму два гады назад узнікла ідэя пабудаваць Дом Марыі, каб стварыць патрэбныя ўмовы для прыбывання моладзі. Сялібу таксама называюць "Дом усіх", бо яго будавалі ўсе, хто меў ахвоту дапамагчы. Найперш — сама моладзь пад духоўнай апекай айца Віктара Мялешкі OFMConv. Прызначаецца гэты Дом таксама для ўсіх, хто толькі пажадае быць разам з Марыяй.

Святочная праграма дня ўключала тры асноўныя часткі. А 12-ай гадзіне распачалася святая Імша, якую ўзначаліў біскуп Алег Буткевіч. У Эўхарыстыі прынялі ўдзел Апостальскі адміністратар грэка-католікаў у Беларусі архімандрыт Сяргей Гаек МІС, дэкан Глыбоцкага дэканату ксёндз канонік Мікалай Ціхановіч шматлікія святары Віцебская дыяцэзіі, а таксама айцы-францішкане з розных куточкаў Беларусі і нават з Масквы.

Урачыстую Літургію сваім спевам упрыгожыў парафіяльны хор “Ave Maria” з Глыбокага, які ў гэтым годзе адзначыў 25 год свайго існавання.

Падчас гаміліі біскуп Алег засяродзіў увагу на асобе Марыі. Іерарх падкрэсліў, што сэрца кожнай маці, баліць за ўсё, што адбываецца з яе дзяцьмі, так і сэрца Маці Божай баліць за кожнага з яе дзяцей, за кожнага з нас. Хай Дом Марыі стане месцам радаснай сустрэчы з нашай нябеснай Маці.

Падчас урачыстага прынашэння дароў мужчыны, якія працавалі на будаўніцтве Сялібы Беззаганнай, прынеслі ў дар ключы ад яе і камень з будоўлі.

На заканчэнне Літургіі ўсе прысутныя склалі Акт прысвячэння сябе Беззаганнай паводле св.Максімільяна Марыя Кольбэ.

Другая частка — урачыстае адкрыццё і асвячэнне Дому Марыі, працягнула свята ўжо на вуліцы. Пасля супольнай малітвы ўсе накіраваліся да Сялібы, каб перарэзаць "стужку". Шквал станоўчых эмоцый выклікаў мамант, калі Яго Эксцэленцыя з дапамогай бензапілы распілаваў бервяно і ўрачыста адчыніў дзверы Сялібы.

Бласлаўленне Дому Марыі распачалося на другім паверсе ў капліцы. Там былі асвечаны алтар, на якім будзе складацца Ахвяра Хрыста, табернакулюм і фігура Маці Божай.

Затым біскуп Алег акрапіў святой вадой іншыя памяшканні: жылыя пакоі для моладзі на другім паверсе, крыж на сцяне перад галоўным уваходам, сталовую, кухню, рэкрэацыю і камінную залу.

На заканчэнне адбылася супольная малітва з Марыйнымі спевамі. Прагучалі словы ўдзячнасці ўсім, хто далучыўся справай і малітвай да будоўлі Сялібы Беззаганнай.

А завяршылася другая афіцыйная частка свята агульным фотаздымкам.

Далейшае святкаванне прадоўжыў абед пад адкрытым небам, які даў пачатак трэцяй — смачна-музычнай частцы. Усе шматлікія госці мелі магчымасць падсілкавацца, пагутарыць і адпачыць.

Прыемным сюрпрызам для ўсіх на заканчэнне абеду стаў прыгожы святочны торт, дакладней — тры, каб хапіла для кожнага.

А 16-ай гадзіне распачалася музычная праграма для моладзі. Дарэчы на чарговы Weekend зарэгістравалася рэкордная колькасць — 115 маладых людзей.

На тварах усіх, хто быў на свяце панавала радасць. Наўкола зіхацелі чыстыя, сяброўскія, адкрытыя ўсмешкі. Разам з хлопцамі і дзяўчатамі засталіся таксама і самыя вытрывалыя людзі сярэдняга і старэйшага ўзросту, каб набрацца іх энергіі, парадавацца таму, што ў нас ёсць па-сапраўднаму веруючая, актыўная і цудоўная моладзь.

Супольныя спевы чаргаваліся з выступленнямі тых, хто жадаў падзяліцца сваім досведам, выказаць словы ўдзячнасці, зрабіць падарункі.

Да позняга вечара моладзь спявала, весялілася і дзякавала Пану Богу, што Ён дазволіў пабудаваць Дом, які будзе насіць імя Яго Маці і стане месцам Яе праслаўлення.

Жанна Закрэўская

04.05.2025