Крыжовы шлях — шлях збаўлення

Парафіяльныя аб'явы Літургічны каляндар Катэхеза Кантакты Відэаматэрыялы

Крыжовы шлях — шлях збаўлення

Перажываем перыяд Вялікага посту — час, калі праз пакутныя набажэнствы, мы асаблівым чынам рыхтуемся да ўрачыстасці Змёртвыхпаўстання Хрыста. Найбольш глыбока зразумець дарогу Езуса на смерць дапамагае набажэнства Крыжовага шляху.

Крыжовы шлях або Дарога крыжовая – гэта набажэнства Вялікага посту, якое носіць адарацыйны характар. Падчас набажэнства вернікі разважаюць над крыжовымі мукамі Хрыста і праслаўляюць Яго за збаўленне чалавецтва. Крыжовая дарога – гэта дарога цярпення, роздуму, пакуты; дарога, якая патрабуе пэўнага часу, якога так нам не хапае… Дарога вельмi жудасная, страшная, бо мы разам з Хрыстом абыходзiм Яго боль i муку…

У нашай парафіі Крыжовая дарога традыцыйна адбываецца кожную пятніцу, суботу і нядзелю. А 18-ай гадзіне ў пятніцу на набажэнства збіраюцца пераважна людзі сярэдняга і старэйшага ўзросту, а ў якасці разважанняў выкарыстоваюцца старадаўнія спевы.

У суботу а 15-ай гадзіне, праводзіцца Крыжовы шлях для міністрантаў і моладзі. Разважанні да стацый на кожную суботу Вялікага посту рыхтуе ксёндз Алег Зямчонак. 8 сакавіка — у Міжнародны дзень жанчын — разважанні былі прысвечаны матулям. Перад набажэнствам прысутныя ў касцёле дзеці і моладзь запісалі на папяровых сэрцах імёны сваіх матуль. Сэрцы прымацавалі на вялікі крыж, з якім потым абыходзілі стацыі Крыжовага шляху. Сэнс гэтага жэсту — малітва ў інтэцыі сваёй маці і ўсёй сям'і.

У нядзелю ў 9.30 адбываецца Крыжовая дарога з удзелам дзяцей. Дзеці, пераходзячы ад стацыі да стацыі, разам спяваюць, моляцца, чытаюць тэксты разважанняў. Добра, калі побач з маленькімі дзецьмі ёсць і іх бацькі, бо такім чынам яны не толькі вучацца правільна ўдзельнічаць у набажэнстве, але і ўсведамляюць важнасць таго, што адбываецца, адчуваюць падтрымку падчас Крыжовага шляху.

Вядома, што такое ўзроставае размежаванне ўмоўнае, кожны вернік можа прыняць ўдзел у любым з набажэнстваў Крыжовай дарогі, якія адпраўляюцца ў нашай парафіі. Галоўнае мець прагненне далучыцца да Мукі Пана праз супольную малітву.

Жанна Закрэўская

09.03.2025

Раім пачытаць

Крыжовы шлях Збаўцы нашага Езуса Хрыста

Паглыбляцца ў сэнс смерці Хрыста