Чарговы год завяршыўся адмысловым набажэнствам
У апошні дзень каляндарнага года ў касцёлах цэлебруецца набажэнства падзякі. У нашай святыні гэтае адмысловае набажэнства распачалося а 17-ай гадзіне з выстаўлення Найсвяцейшага Сакраманту. На пачатку вернікі мелі магчымасць у цішыні выказаць Пану Богу словы падзякі за пражыты год, а затым адбылася супольная ружанцовая малітва.
Наступным істотным момантам набажэнства стала малітва, якая складалася з трох этапаў: перапрашэння за ўчыненыя грахі, падзякі за атрыманыя дары і ласкі, просьбы аб падтрымцы ў надыходзячым новым годзе.

А потым, узносячы хвалу і пашану Пану Богу, усе разам праспявалі гімн "Цябе, Божа, праслаўляем". Завяршылася набажэнства бласлаўленнем Найсвяцейшым Сакрамантам.

Якім жа быў гэты год для нашай парафіяльнай супольнасці? Узгадаем некалькі асноўных момантаў:

- 9 мая мінула 10 гадоў з дня смерці былога пробашча ксяндза каноніка Уладаса Пятрайціса;

- 17 мая ксёндз пралат Крыштаф Мянкіна адзначыў 35-ую гадавіну з дня прыняцця прэзбітэрскага пасвячэння;


- 22 мая на Імшы а 12-ай гадзіне 28 дзяцей з нашай парафіі ўпершыню прынялі Святую Камунію;

- 25 чэрвеня ў нашай святыні адбыўся канцэрт у рамках рэспубліканскага фестывалю акадэмічнай арганнай музыкі “Ars Magna Organi” (Вялікае мастацтва аргана);

- з 9 па 12 кастрычніка айцы-рэдэмптарысты правялі аднаўленне Святых Місій;

- 29 кастрычніка ў Браславе прайшла першая агульнадыяцэзіяльная сустрэча груп Апостальства дапамогі душам чыстцовым;

- 10 лістапада ў нашым касцёле адбылася сустрэча святароў і кансэкраваных асоб, якія працуюць на тэрыторыі Віцебскай дыяцэзіі.

- 22 лістапада Дэкрэтам біскупа Віцебскага Алега Буткевіча былі аб'яднаныя Мёрскі і Шаркаўшчынскі дэканаты.

На працягу года вялася работа па добраўпарадкаванні святыні. Была пафарбавана са знешняга боку капліца ў Пераброддзі, праведзены значныя ўнутраныя работы ў капліцы на новых могілках.

Наша парафія жыве і развіваецца. У гэтым вялікая заслуга тых, для каго Касцёл і святыня не проста традыцыя ці нядзельны абавязак, а — сэнс жыцця. Пан Бог, як ніхто іншы, ведае сэрца і патрэбы кожнага чалавека, таму заахвочваем да малітвы за тых парафіянаў, дзякуючы якім чыста і ўтульна ў святыні, хто аздабляе музыкай і спевамі Літургію, рыхштуе нашых дзяцей да прыняцця сакрамантаў, штодня моліцца на Ружанцы за нашу супольнасць, за ўсіх ахвярадаўцаў і дабрадзеяў, справы якіх магчыма не заўважаем, але іх унёсак вялікі ў вачах Пана.
Жанна Закрэўская
Адрас для карэспандэнцыі:

вул. Паштовая, д.11,
211287 г. Міёры
Віцебская вобласць
Тэлефон: +375 (2152) 41836
е-mail:
kascelmery@gmail.com
Выкарыстанне матэрыялаў дазваляецца пры ўмове спасылкі (гiперспасылкi) на kascelmery.by
Рыма-каталіцкая парафія Унебаўзяцця Найсвяцейшай Панны Марыі